На гэты момант сабрана больш за 3100 тысяч эўра. Аб эвакуацыі Тацяны Крапіневіч зь Беларусі разам з 15-гадовай дачкой кіраўнік BySol Андрэй Стрыжак паведаміў 28 студзеня. Тады ж было паведамлена аб пачатку збору сродкаў. Крапіневіч была вымушана пакінуць краіну праз наступствы даносу праўладнай актывісткі Вольгі Бондаравай.
«Доўгі час я працавала ў бізнэс-сфэры ў Менску, але, імкнучыся зрабіць унёсак у разьвіцьцё адукацыі, прыняла рашэньне пераехаць зь Менску ў горад Ляхавічы Берасьцейскай вобласьці па праграме „Настаўнік для Беларусі“ і прысьвяціць сябе пэдагагічнай дзейнасьці. За пяць гадоў у ляхавіцкай гімназіі я прайшла шлях ад настаўніцы да намесьніцы дырэктара ў навучальнай працы», — гаворыць пэдагог у апісаньні да збору.
Праца Крапіневіч «была адзначаная на рэспубліканскім узроўні», у 2023 годзе яна стала фіналісткай конкурсу «Настаўнік году Рэспублікі Беларусь».
«Аднак, нягледзячы на ўсе мае намаганьні і дасягненьні, у сьнежні 2024-га я сутыкнулася з несправядлівым абвінавачаньнем у „экстрэмісцкай дзейнасьці“. Вольга Бондарава на мяне напісала сэрыю даносаў, і мной зацікавіліся сілавікі», — зазначае настаўніца.
Па словах Крапіневіч, суд у яе справе быў прызначаны на 28 студзеня. Пасьля гэтага жанчына з дачкой экстрана пакінулі Беларусь. Цяпер яны знаходзяцца ў Варшаве.
ГЛЯДЗІЦЕ ТАКСАМА: «Я не вучыла дзяцей хадзіць шыхтом». Размова з настаўніцай Тацянай Крапіневіч, якая зьехала з краіны праз даносы Бондаравай