Сьвежую статыстыку, датычную Беларускай праваслаўнай царквы Маскоўскага патрыярхату, апублікавалі 25 лютага ў сувязі з сустрэчай кіраўніка БПЦ мітрапаліта Веньяміна з Аляксандрам Лукашэнкам. Пры параўнаньні са статыстыкай, разьмешчанай на сайце Апарату ўпаўнаважанага ў справах рэлігій і нацыянальнасьцяў, рэсурс Katolik.life высьветліў, што за год царква пазбылася 68 супольнасьцяў і двух брацтваў.
Як паведамляюць у новай справаздачы, сёньня БПЦ налічвае 1669 рэлігійных суполак, а на 1 студзеня 2024 году іх было 1737. Год таму было 15 брацтваў, а цяпер — 13.
Падобна, гэта наступствы абвешчанай уладамі кампаніі перарэгістрацыі рэлігійных арганізацый у Беларусі. Прычым працэс перарэгістрацыі яшчэ не завяршыўся.
Нягледзячы на тое, што колькасьць праваслаўных суполак зьменшылася, колькасьць храмаў БПЦ МП за год павялічылася — як дзейных (іх цяпер 1880, на два больш, чым год таму), так і тых, што будуюцца (153 — на шэсьць больш, чым летась).
ГЛЯДЗІЦЕ ТАКСАМА: СБУ падазрае былога кіраўніка БПЦ Паўла ў «дапамозе захопу храмаў» на акупаваных тэрыторыях УкраіныСтатыстыку аб Каталіцкай царкве пакуль не публікавалі, але раней сайт высьветліў, што колькасьць суполак рыма-каталікоў у Беларусі таксама скарацілася — іх засталося менш за 500. Ёсьць прычыны, чаму многія парафіі ня могуць прайсьці перарэгістрацыю і вымушаныя падаваць заявы аб ліквідацыі. Яны ў лічбе ў 20 заснавальнікаў прыходу, патрэбных паводле новага закону для яго рэгістрацыі.
У выпадку сьмерці ці пераезду ў іншы горад хаця б аднаго з заснавальнікаў трэба зноў склікаць сход, выбіраць чалавека на замену і падаваць паперы на рэгістрацыю ў выканкам. Гэта робіць працэс больш складаным.
ГЛЯДЗІЦЕ ТАКСАМА: Прагматычны падыход Ватыкана. Чаму Касьцёл маўчыць пра рэпрэсіі над сьвятарамі