1 сакавіка Сьвяты пасад распаўсюдзіў кароткае паведамленьне аб стане здароўя пантыфіка.
«Ноч прайшла спакойна, Папа адпачывае», — гаворыцца ў камюніке, якое распаўсюдзіла Ватыканскае радыё.
У апублікаваным напярэдадні вечарам мэдыцынскім бюлетэні паведамлялася пра раптоўнае пагаршэньне стану Францішка. Гэта адбылося пасьля ізаляванага прыступу бронхаспазму.
Мэдыкі правялі бронхаасьпірацыю і пачалі неінвазыўную штучную вэнтыляцыю лёгкіх. Гэтыя манэўры дазволілі палепшыць дыхальныя функцыі.
З Ватыкану паведамляюць, што папа Францішак застаецца ў прытомнасьці і супрацоўнічае з мэдыкамі ў час тэрапэўтычных мерапрыемстваў. Прагноз застаецца стрыманым.
Папа знаходзіцца ў рымскай клініцы «Джэмэлі» з дыягназам двухбаковая пнэўманія. Клінічная карціна складаная. На плошчы Сьвятога Пятра сёньня і ўчора — малітвы за здароўе папы.
Раней паведамлялася пра тое, што Папа можа датэрмінова пакінуць Сьвяты сталец з прычына пагаршэньня здароўя. З таго моманту стан Папы пагоршчыўся, а ў Ватыкане больш не камэнтавалі гэта.
ГЛЯДЗІЦЕ ТАКСАМА: Corriere della Sera: папа Францішак можа адрачыся ад сану ГЛЯДЗІЦЕ ТАКСАМА: У Ватыкане абмеркавалі «сытуацыю Каталіцкага касьцёла ў Беларусі» і яго ўзаемадзеяньне з уладамі