Прэзыдэнт ЗША Дональд Трамп заявіў, што ўрадавага «шатдаўну» ня будзе, паколькі прапанаваны законапраект аб фінансаваньні ўраду будзе ўхвалены.
«Гэта можа здарыцца. Гэтага не павінны было адбыцца і, імаверна, ня будзе», — сказаў Дональд Трамп журналістам аб магчымым спыненьні дзяржаўнага фінансаваньня.
Чакаецца, што Палата прадстаўнікоў, якую ачольваюць рэспубліканцы, прагаласуе за рэзалюцыю 11 сакавіка, паколькі ў канцы тыдня фінансаваньне заканчваецца. Гэты дакумэнт забясьпечыць фінансаваньне ўраду да 30 верасьня.
ГЛЯДЗІЦЕ ТАКСАМА: У Кангрэсе ЗША адхілілі законапраект аб часовым фінансаваньні ўраду, краіне пагражае «шатдаўн»Летась у сьнежні Сэнат ЗША ўхваліў закон аб часовым фінансаваньні, які дазваляў пазьбегнуць так званага «шатдаўну» да сакавіка 2025 году.
Ухваленьне дзяржаўнага бюджэту Кангрэсам ЗША заўсёды было складаным працэсам з прычыны падзелу дзьвюх палат паміж рэспубліканцамі і дэмакратамі.
У ЗША фінансавы год пачынаецца з 1 кастрычніка і працягваецца да 30 верасьня. Ва ўмовах, калі бюджэт на новы фінансавы год не ўхвалены Кангрэсам і не падпісаны прэзыдэнтам, фінансаваньне дзяржаўных устаноў адбываецца на падставе рэзалюцый аб часовым фінансаваньні на ўзроўні папярэдняга фінансавага году.
ГЛЯДЗІЦЕ ТАКСАМА: Замарожваньне замежнай дапамогі Трампам можа стаць бонусам для аўтарытарных рэжымаў сьвету, уключна з Лукашэнкам
Шатдаўн — сытуацыя, калі пасьля завяршэньня папярэдняга фінансавага году бюджэт на новы год яшчэ не прайшоў узгадненьня ў Кангрэсе. У такім выпадку значная частка дзяржаўных службоўцаў вымушана спыніць работу.