Дах клюбу Jet Set абрынуўся, калі ў начным клюбе праходзіў канцэрт папулярнага ў Лацінскай Амэрыцы сьпевака Рубі Пэрэса, піша агенцтва AP.
Што стала прычынай абурваньня, пакуль незразумела. Паводле некаторых сьведчаньняў, у гэты час у клюбе былі каля тысячы чалавек. Пацярпелі больш за 150 чалавек.
Паводле Хуана Мануэля Мэндэса, дырэктара Цэнтру надзвычайных сытуацыяў, ратаўнікі надалей працуюць у аднапавярховым клюбе Jet Set у Санта-Дамінга, шукаюць людзей, якія выжылі сярод завалаў.
«Мы працягваем расчышчаць завалы і шукаць людзей, — сказаў ён. — Мы будзем нястомна шукаць людзей».
Пазьней ён сказаў, што за апошнія чатыры гадзіны нікога жывога выявіць не ўдалося.
Прэзыдэнт Дамініканскай Рэспублікі Люіс Абінадэр напісаў у сацыяльнай сетцы X, што ўсе выратавальныя службы «працуюць не апускаючы рук», каб дапамагчы пацярпелым.
«Мы глыбока шкадуем аб трагедыі, якая адбылася ў начным клюбе Jet Set. Мы сачылі за інцыдэнтам кожную хвіліну з таго часу, як ён адбыўся», — запэўніў ён.
Сярод ахвяраў абурваньня даху аказаліся вядомыя ў Дамінікане людзі: палітыкі, спартсмэны, музыканты. Раней паведамлялі, што сьпевака Рубі Пэрэса ўжо дасталі з-пад завалаў. Аднак пазьней дырэктар Цэнтру надзвычайных сытуацыяў зьняпраўдзіў гэтую інфармацыю. Ён сказаў, што ратаўнікі ўсё яшчэ шукаюць артыста.
ГЛЯДЗІЦЕ ТАКСАМА: Лёнданскі аэрапорт «Хітроў» цалкам аднавіў працу пасьля пажару на электрападстанцыі