У Вільні прайшлі ператрусы ў кампаніі, якую падазраюць у пастаўках тавараў у Беларусь і Расею ў абыход санкцыяў Эўразьвязу, паведаміла 24 красавіка Літоўская мытня.
Ператрусы прайшлі 10 красавіка ў адміністрацыйных і таварных памяшканьнях віленскай кампаніі, якая надае транспартныя, лягістычныя і экспэдытарскія паслугі, а таксама ў дамах яе кіраўнікоў і супрацоўнікаў.
Падчас ператрусаў сканфіскавалі буйныя сумы грошай, зброю, боепрыпасы, выбуховыя рэчывы і вялікую колькасьць патэнцыйна падсанкцыйных тавараў, а таксама дакумэнтацыю і кампутары. Мяркуецца, што гэтыя тавары мелі трапіць у Расею празь дзяржавы Цэнтральнай Азіі.
Кошт сканфіскаваных тавараў, паводле папярэдняй ацэнкі, складае каля 1,5 мільёна эўра. Цяпер літоўскія праваахоўнікі вывучаюць дакумэнты і ацэньваюць тавар, падчас расьсьледаваньня могуць усплыць новыя акалічнасьці, адзначылі ў Літоўскай мытні.
Прадстаўнікі Мытнай крымінальнай службы Літвы сьцьвярджаюць, што раскрылі схему абыходу санкцыяў, якія забараняюць экспарт падсанкцыйных тавараў у Расею і Беларусь. Падсанкцыйныя тавары спачатку вывозілі ў краіны Цэнтральнай Азіі (у асноўным у Кіргізстан), а потым адтуль нелегальна везьлі ў Расею. Паводле ведамства, кампанія ня толькі сама карысталася такой схемай абыходу санкцыяў, але і дапамагала рабіць гэта іншым кампаніям.
Пачалі дасудовае расьсьледаваньне факту парушэньня міжнародных санкцыяў. Дырэктара, уладальніка кампаніі і трох супрацоўнікаў затрымалі, але вызвалілі пасьля допыту з падпіскай аб нявыезьдзе.
ГЛЯДЗІЦЕ ТАКСАМА: Падсанкцыйную беларускую драўніну кантрабандай увозяць у Вялікую Брытанію, — The Guardian ГЛЯДЗІЦЕ ТАКСАМА: У Літве вырашылі прадаць з аўкцыёну ўвезеныя зь Беларусі пажарныя машыны і малакавозы