У сапраўдны момант кантроль над фондам Białoruś Liberty адноўлены. Праз упаўнаважаных прадстаўнікоў мы атрымалі зьвесткі пра ўсе рухі па рахунку ў злотых з пачатку 2024 году, паведамілі «Кібэрпартызаны».
Сьцісла яны абазначылі некалькі пунктаў, якія апублікавалі ў сваім канале.
- Страты для суполкі Кібэрпартызанаў склалі каля 30 тысяч даляраў. Гэта сродкі фонду, вылучаныя на праекты «Партызанскага тэлеграму», дапамога ў расьсьледаваньнях і вэрыфікацыі.
- Гэта патэнцыйна запаволіць працы па «Партызанскім тэлеграме» і дапамогу ў журналісцкіх расьсьледаваньнях. Але не закранае працу па ўзломах і нападах на сеткі рэжымаў РБ і РФ.
Сярод іншага, высьветлілася, што на працягу лютага 2025 году Мельнікава раз на некалькі дзён выводзіла на асабісты рахунак сродкі сумамі да 2,5 тысяч даляраў, якія ёй не належалі. У тым ліку выкарыстоўвала сэрвіс экспрэс-пераводаў для паскарэньня транзакцый.
Пераказ па гранце для Каардынацыйнай рады — каля 107 тысяч даляраў — паступіў на рахунак фонду 13 сакавіка. Атрыманьне гэтай сумы не ўзгаднялася з прадстаўнікамі «Кібэрпартызанаў», суполцы не давялі да ведама нават сам факт такога выкарыстаньня рахунку фонду.
На працягу сакавіка Мельнікава вывела на асабісты рахунак у некалькі апэрацый усю пераведзеную суму гранта для Каардынацыйнай рады, а таксама ўсе сродкі, што былі на рахунку, у тым ліку прызначаныя на праекты Партызанскага тэлеграму і дапамогу ў журналісцкіх расьсьледаваньнях (каля 30 тысяч даляраў). Самыя буйныя пераклады былі зроблены 5 і 18 сакавіка. Агулам Мельнікава вывела больш за 150 тысяч даляраў. Апошняя апэрацыя па вываду сродкаў датуецца 24 сакавіка 2025 году.
«Нам невядомыя матывы, з-за якіх Мельнікава вырашыла прысвоіць чужыя сродкі і схавацца пасьля многіх месяцаў кампэтэнтнай працы з добрай рэпутацыяй. Гэта магло быць з-за шантажу ці яе добраахвотнае рашэньне. У любым выпадку па факце крадзяжу пададзеная заява ў праваахоўныя органы Польшчы», — адзначылі «Кібэрпартызаны».
Падрабязнасьці апэрацый яны апублікавалі на сваім сайце.
ГЛЯДЗІЦЕ ТАКСАМА: Ці зможа рахунак з грашыма Каардынацыйнай рады расказаць, што адбылося з Анжалікай МельнікавайСуполка таксама выступіла з заявай адносна непацьверджаных зьвестак пра зьніклую былую кіраўніцу фонду.
«Мы стараемся зыходзіць з фактаў і не апускацца ў плёткі ці спэкуляцыі. Таму публікаваць інфармацыю ў справе Мельнікавай будзем па меры паступленьня новых пацьверджаных зьвестак».
ГЛЯДЗІЦЕ ТАКСАМА: «Атрымлівала пагрозы блізкім і родным». Што вядома пра зьнікненьне Мельнікавай празь месяц пошукаў- «Кібэрпартызаны» — беларуская дэцэнтралізаваная супольнасьць ананімных хакераў, зьявілася ў верасьні 2020 году.
- Атрымалі вядомасьць дзякуючы шэрагу пасьпяховых кібэратак на рэсурсы дзяржаўных установаў і сілавых структураў Беларусі, публікацыям кампрамату на прадстаўнікоў апошніх, а таксама разьмяшчэньню у адкрытым доступе службовай і сакрэтнай інфармацыі.
- Супольнасьць пачала дзейнасьць у адказ на дзяржаўныя рэпрэсіі супраць пратэстоўцаў.
- Сваю дзейнасьць «Кібэрпартызаны» называюць барацьбой з Аляксандрам Лукашэнкам.