Выданьне CNN піша, што гэта Юрась Зянковіч. Раней адваката беларускага паходжаньня з амэрыканскім пашпартам асудзілі на 11 гадоў калёніі ўзмоцненага рэжыму. Ён праходзіў у адной справе з Рыгорам Кастусёвым і Аляксандрам Фядутам.
«Я ведала, што гэты дзень настане. Гэта заняло 1480 дзён, але ён выжыў і ўжо едзе дадому да мяне і ў Амэрыку», — сказала жонка Зянковіча Алена Дзенісавец. «Я хачу падзякаваць прэзыдэнту Трампу, сакратару Рубіё, спэцыяльнаму пасланьніку Болеру і супрацоўнікам SPEHA. Я таксама хачу выказаць сваю ўдзячнасьць прадстаўніку Моргану Латрэлу і некамэрцыйным арганізацыям Global Reach і James W. Foley Legacy Foundation за іхную дапамогу ў абароне правоў Юрася».
Зянковіча ўвечары 17 студзеня паказвалі па дзяржаўнай тэлевізіі. Было відаць, як ён схуднеў. Пасьля гэтага на некалькі месяцаў навінаў ад палітвязьня не было.
Іншага фігуранта справы, Рыгора Кастусёва, хворага на анкалёгію, вызвалілі 3 ліпеня 2024 году. Аляксандар Фядута застаецца за кратамі, стан ягонага здароўя кепскі, калі судзіць па тых зьвестках, якія даходзілі пра ягоны стан раней.
- Юрась Зянковіч — беларускі палітык, амэрыканскі юрыст. Разам зь іншымі фігурантамі «справы змоўцаў» яго затрымалі ў красавіку 2021 году. Пасьля гэтага КДБ і ФСБ заявілі, што нібыта перадухілілі замах на Лукашэнку і ягоных сыноў, а таксама што «раскрылі дзяржаўны пераварот». Зянковіч — адзіны зь пяці абвінавачаных у гэтай справе, хто заключыў дамову зь сьледзтвам. Ён цалкам прызнаў сваю віну і не адмаўляў, што быў арганізатарам змовы. Таксама ён папрасіў прабачэньня ў саўдзельнікаў.
- Яго прызналі вінаватым паводле ч. 1 арт. 357 («змова з мэтай захопу дзяржаўнай улады неканстытуцыйным шляхам»), ч. 1 арт. 361-1 («стварэньне экстрэмісцкага фармаваньня і кіраваньне ім»), ч. 3 арт. 361 («публічныя заклікі да захопу дзяржаўнай улады») і ч. 3 арт. 130 КК («распальваньне сацыяльнай варожасьці»). У верасьні 2022 году Юрыю прысудзілі 11 гадоў калёніі ўзмоцненага рэжыму.
- Праз тры месяцы палітвязьня судзілі ўжо ў новай крымінальнай справе. Тады Зянковіча абвінавацілі ў «абразе прадстаўніка ўлады» (арт. 369 КК). Падставаю сталі «абразьлівыя камэнтары ў тэлеграм-канале, прызнаным экстрэмісцкім». У сьнежні 2022 году суд Мядзела дадаў яму яшчэ паўгода зьняволеньня.
У студзені рэжым Лукашэнкі пасьля перамоў з прадстаўнікамі адміністрацыі Трампа выпусьціў з турмы Анастасію Нуфер, якую затрымалі ў сьнежні 2024 году. У сярэдзіне лютага 2025 выпусьцілі з турмы пасаджанага туды ў верасьні 2024 году яшчэ аднаго грамадзяніна ЗША, але ягонае імя дасюль застаецца невядомым.
Форум