9 траўня на Краснай плошчы ў Маскве сярод парадных разьлікаў расейскага войска і прадстаўнікоў 13 замежных краін (у тым ліку Азэрбайджану, Кітаю, Віетнаму, Эгіпту, Манголіі, М’янмы) прыняў удзел парадны разлік 5-й асобнай брыгады спэцыяльнага прызначэньня Ўзброеных сілаў Рэспублікі Беларусь, якой камандуе палкоўнік Мікалай Сьмяховіч.
Ён жа ўзначальваў калёну беларускіх салдатаў на парадзе ў Маскве.
Гэтая частка вядомая як элітная брыгада спэцназу з Мар’інай Горкі.
Іхныя падраздзелы, сярод іншага, ахоўвалі беларуска-ўкраінскае памежжа пасьля пачатку поўнамаштабнай вайны Расеі ва Ўкраіне.
На вайсковы парад у Маскве прыбылі прадстаўнікі больш як 20 замежных дзяржаваў, у тым ліку старшыня КНР Сі Цзіньпін, прэзыдэнт Сэрбіі Аляксандар Вучыч, прэм’ер-міністар Славаччыны Робэрт Фіца і Аляксандар Лукашэнка.
Аляксандар Лукашэнка 8 і 9 траўня меў пратакольныя сустрэчы з Уладзімірам Пуціным.
Як было бачна ў трансьляцыі, Аляксандра Лукашэнку і ягонага сына Мікалая пасадзілі побач з прэм’ер-міністрам Армэніі Ніколам Пашыньянам. Гэтыя палітыкі публічна канфліктавалі паміж сабой, у кастрычніку 2022 году Лукашэнка накрычаў на Пашыньяна на нечарговай сэсіі Савету калектыўнай бясьпекі АДКБ. Сэсію склікала Армэнія, тэмай быў армяна-азэрбайджанскі канфлікт у Нагорным Карабаху і дапамога АДКБ ва ўрэгуляваньні сытуацыі.
Форум