У лютым Эўрапейская камісія паведаміла, што правазнаўцы з ЭЗ, Службы вонкавых дзеяньняў ЭЗ, Рады Эўропы, Украіны і 37 іншых краін «заклалі юрыдычныя асновы для стварэньня Спэцыяльнага трыбуналу за злачынства агрэсіі супраць Украіны».
Чакаецца, што Спэцыяльны трыбунал будзе афіцыйна створаны ў Люксэмбургу 14 траўня, калі там адбудзецца паседжаньне Камітэту міністраў Рады Эўропы.
Злачынства агрэсіі — гэта «злачынства кіраўніцтва», учыненае «асобай на пасадзе, якая мае магчымасьць эфэктыўна ажыцьцяўляць кантроль або накіраваньне палітычных ці ваенных дзеяньняў».
Пад гэтае азначэньне падпадаюць палітыкі Расеі і патэнцыйна палітыкі іншых краін, якія спрычыніліся да падрыву тэрытарыяльнай цэласнасьці Ўкраіны, а менавіта кіраўнікі Беларусі, Ірану і Паўночнай Карэі.
У львоўскай ратушы адбылася сустрэча, на якой абмяркоўваліся тры пытаньні.
«Гэта тры гістарычныя падзеі, якія адбыліся ў Львове. Гэта паседжаньне Рады міністраў замежных спраў краін-сяброў ЭЗ. Мы абмеркавалі шэраг пытаньняў нашай супольнай сучаснасьці і будучыні. Падпісанае пагадненьне аб накіраваньні траншу прыбытку ад замарожаных расейскіх актываў ва Ўкраіну.
Гэтае пагадненьне заключанае паміж ЭЗ, Даніяй, Францыяй і Італіяй. Гаворка пра сродкі з „Эўрапейскага фонду міру“ ў памеры каля 1 мільярда эўра. На гэтыя сродкі краіны-падпісанты закупяць зброю для патрэбаў Украіны ва ўкраінскіх збройнікаў. Украіна настойвае на поўнай канфіскацыі замарожаных расейскіх актываў ва ўсім сьвеце. Гэта неабходна для аднаўленьня справядлівасьці і прадухіленьня вайны ў будучыні», — заявіў прэм’ер-міністар Украіны Дзяніс Шмыгаль.
Яшчэ адной падзеяй стала сустрэча кааліцыі дзяржаў у стварэньні спэцыяльнага трыбуналу ў злачынствах расейскай агрэсіі супраць Украіны, гэта значыць у прыцягненьні высокага кіраўніцтва Расеі і Беларусі да адказнасьці за паўнамаштабнае ўварваньне ва Ўкраіну ў лютым 2022 году.
Таксама ў Львове падтрымалі рашэньне аб зацьверджаньні працы юрыдычных групаў, а таксама распрацаваныя праекты юрыдычных дакумэнтаў, неабходных для стварэньня спэцыяльнага трыбуналу.
«Мы працавалі над гэтым праектам больш за 2,5 гады. Працавала сур’ёзная каманда юрыстаў. Экспэрты распрацавалі прымальную для Ўкраіны формулу, якая захоўвае прынцып непазьбежнасьці пакараньня для ўсіх, у тым ліку для так званай тройкі: прэзыдэнта Расеі, прэм’ер-міністра Расеі і міністра замежных спраў Расеі. Усе яны зьяўляюцца міжнароднымі ваеннымі злачынцамі. І стварэньне трыбуналу мае на мэце выносіць адпаведныя прысуды ў будучыні. Трыбунал будзе працаваць у Гаазе. Зараз мы пачынаем працаваць з Радай Эўропы, якая зьяўляецца цэнтральным элемэнтам гэтага працэсу. Сёньня мы прынялі палітычны дакумэнт „Львоўская дэклярацыя“», — заявіў міністар замежных спраў Украіны Андрэй Сібіга.
Бліжэйшым часам Рада Эўропы і Ўкраіна падпішуць пагадненьне ў Люксэмбургу, і трыбунал пачне працу.
Трыбунал прызначаны дапоўніць расьсьледаваньне ваенных злачынстваў, злачынстваў супраць чалавечнасьці і генацыду, распачатае Міжнародным крымінальным судом тры гады таму, і запоўніць прабелы ў расьсьледаваньні гэтых злачынстваў.
Львоў абралі для такой сустрэчы невыпадкова, бо тут жыў аўтар тэрміну «генацыд», польска-амэрыканскі юрыст Рафаэль Лемкін. Ён атрымаў юрыдычную адукацыю ў Львове ў 1920-х гадах.
«Гэта ня проста сымбалічная сустрэча, ня проста сымбалічныя візыты, а сапраўдная праява салідарнасьці і падтрымкі ў самыя цяжкія для Ўкраіны моманты», — адзначыла Высокая прадстаўніца Эўразьвязу ў замежных справах і палітыцы бясьпекі Кая Калас. Яна адзначыла, што гэта важная сустрэча ў той час, калі ў Крамлі праходзіць мілітарысцкі парад.
Міністры замежных спраў і іншыя ўдзельнікі сустрэчы ў Львове агледзелі выставу, дзе вайскоўцы прадставілі сродкі, з дапамогай якіх Расея зьнішчае гарады і паселішчы ва Ўкраіне і мірных жыхароў. Гэта элемэнты расейскіх ракет, бесьпілётнікаў. Таксама падрабязна апісана, якія краіны Расея выкарыстоўвае, здабываючы гэтыя сродкі.
«Праблема ў тым, што гэтыя элемэнты не прызначаныя для ваенных мэтаў і, як правіла, гэта грамадзянскія элемэнты, якія можна купіць. Таму перакрыць каналы паставак вельмі цяжка. Але дзякуючы санкцыям сытуацыя для расейцаў толькі пагаршаецца. Калі ў 2022 годзе яны маглі пастаўляць зь некаторых краін непасрэдна ў Расею, то цяпер пастаўкі ідуць празь некалькі краін, празь некалькі кампаній у кожнай краіне. Гэта азначае, што цана расьце, і элемэнты цяжэй атрымаць», — растлумачыў на выставе ўкраінскі вайсковец.
Міністры замежных спраў Эўразьвязу напярэдадні, 7-8 траўня, правялі нефармальную сустрэчу ў Варшаве, а сёньня прыбылі ў Львоў, каб прадэманстраваць салідарнасьць з Украінай на тле маштабных сьвяткаваньняў Дня Перамогі ў Расеі.
Форум