Пра гэта Дональд Трамп заявіў 19 траўня падчас размовы з журналістамі ў Белым доме.
«Я думаю, што ёсьць шанец нешта зрабіць. І калі вы гэта зробіце (уведзяце санкцыі. — РС), гэта можа значна пагоршыць сытуацыю. Але можа надысьці час, калі гэта здарыцца», — сказаў Трамп, якога цытуе Reuters.
Ён таксама сказаў, што верыць у жаданьне расейскага лідэра Ўладзіміра Пуціна спыніць вайну: «Я думаю, што яму досыць». Паводле словаў Трампа, інакш ён бы не размаўляў з Пуціным.
Што тычыцца Ўкраіны, то, як заявіў прэзыдэнт ЗША, ён зможа ацаніць, ці дастаткова яна робіць для дасягненьня спыненьня агню празь некалькі тыдняў.
«Я б лепш адказаў вам прыкладна праз два тыдні, бо не магу сказаць „так“ ці „не“... Я лічу, што Зяленскі — моцны хлопец, з ім нялёгка мець справу». Але я думаю, што ён хоча спыніцца... Але я змагу лепш адказаць на гэтае пытаньне праз два-чатыры тыдні», — сказаў Трамп.
Напярэдадні прэзыдэнт ЗША заявіў, што ягоная размова з прэзыдэнтам Расеі Ўладзімірам Пуціным прайшла «вельмі добра» і што Расея і Ўкраіна павінны «неадкладна» пачаць перамовы аб спыненьні агню і спыненьні вайны.
Прэзыдэнт ЗША дадаў, што паведаміў пра вынікі перамоваў Уладзіміру Зяленскаму і лідэрам «Кааліцыі ахвочых».
Канцлер Нямеччыны Фрыдрых Мэрц, які разам зь іншымі эўрапейскімі лідэрамі быў удзельнікам тэлефонных перамоваў з прэзыдэнтам ЗША Дональдам Трампам, заявіў, што Эўропа павялічыць санкцыйны ціск на Маскву.
Як піша Ўкраінская служба Радыё Свабода, прэзыдэнт Украіны Ўладзімір Зяленскі пасьля гэтай размовы заявіў, што калі Масква не пагодзіцца на спыненьне агню, чакаецца пакет санкцыяў ЭЗ. Што да пакету санкцый ЗША, то, паводле Зяленскага, гэта «іншая гісторыя».
«Тут нам усім трэба шмат працаваць разам са Злучанымі Штатамі Амэрыкі, каб яны ўвялі адпаведныя санкцыі ў нейкі момант, калі гэта магчыма». «Гэта вельмі дапаможа — банкаўскія і энэргетычныя санкцыі. Ці будуць Пуцін і расейская армія працягваць зарабляць грошы на гэтай вайне, ці не, вельмі залежыць ад Амэрыкі», — дадаў ён.
Пасьля тэлефоннай размовы з Трампам 19 траўня Пуцін заявіў журналістам, што Расея і Ўкраіна «павінны знайсьці кампрамісы, якія задаволяць абодва бакі». Паводле яго, «Расейская Фэдэрацыя гатовая працаваць з Кіевам над мэмарандумам аб будучай мірнай дамове».
Гэтыя тэлефонныя званкі адбыліся пасьля асабістай сустрэчы прадстаўнікоў Расеі і Ўкраіны ў Стамбуле. Гэта была першая сустрэча паміж двума бакамі зь першых тыдняў поўнамаштабнага ўварваньня Расеі ва Ўкраіну ў лютым 2022 году.
Стамбульскія сустрэчы, якія ўключалі асобныя размовы з амэрыканскімі чыноўнікамі, не прывялі да значнага прагрэсу, але прывялі да пагадненьня пра абмен 1000 на 1000 ваеннапалонных. Ніякіх абавязаньняў спыніць баявыя дзеяньні не было, а мінулымі выходнымі Расея ўчыніла адзін з найбуйнейшых, паводле зьвестак украінскага боку, нападаў бесьпілётнікаў на Ўкраіну.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- У красавіку высьветлілася, што мірныя перамовы пакуль ня маюць посьпеху, а тым часам Украіна заявіла, што ведае імёны 155 кітайскіх наймітаў, якія падпісалі кантракты з Расеяй і пайшлі на вайну. Афіцыйны Пэкін заявіў, што сваіх грамадзянаў на вайну не адпраўляў, а наадварот, раіў жыхарам краіны трымацца падалей ад абодвух бакоў.
- Дзяржаўны ўкраінскі праект «Хачу жыць», які выконвае Каардынацыйны штаб у пытаньнях абыходжаньня з ваеннапалоннымі, у красавіку 2025 году апрылюдніў прозьвішчы 742 грамадзян Беларусі, якія з 2023 году ваююць супраць Украіны на баку Расеі, зь іх 96 ужо загінулі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум