Грамадзянін ЗША Антон Рос пакінуў Беларусь, расказалі ў этэры тэлеканалу «Беларусь 1», паведамляе БЕЛТА.
Антон Рос разам з сваімі бацькамі перасёк беларускую мяжу ў ноч на 8 траўня. Ён правёў больш за тры тыдні ў РНПЦ псыхічнага здароўя. Тут ён сустрэўся з сваёй сям’ёй.
Ягоная маці сьцьвярджае, што ў сына праблемы з памяцьцю. Каб забраць сына, Ларыса Рос 13 гадзін правяла за стырном аўтамабіля.
«Шкада, што ён так зрабіў. Я прыношу свае прабачэньні, бо гэта правапарушэнне. Можна яму толькі дараваць, бо ён не падумаў. У чалавека праблема з памяцьцю», — сказала Ларыса Рос у інтэрвію дзяржаўным СМІ.
27-гадовага Антона Роса затрымалі супрацоўнікі беларускай мытні на чыгуначнай станцыі Маладэчна за незаконнае перасячэньне мяжы ўначы 31 сакавіка. Ён ехаў зь Літвы ў адным з парожніх вагонаў. Папярэдні разбор паказаў, што грамадзянін ЗША яшчэ 24 сакавіка двойчы спрабаваў уехаць у Беларусь.
Беларускія прапагандысты паказалі сюжэт зь ім. Як стала вядома зь сюжэту прапагандысцкага каналу «Первый информационный», Антон Рос сказаў, што ўжо быў у Менску некалькі гадоў таму, і заявіў, што хацеў бы застацца ў Беларусі.
«Так атрымалася, што ў мяне цяжка з дакумэнтамі, я ў роспачы паспрабаваў апошняй спробай дабрацца да вас сюды. Я быў калісьці ў Беларусі, мне тады вельмі спадабалася», — расказаў прапагандыстам Антон Рос па-расейску.
Ён адзначыў, што «хадзіў у расейскую школу некалькі гадоў».
Таксама Антон Рос сказаў, што «ў войску ніякім не служыў» і ня мае дачыненьня да сытуацыі з гібельлю падчас вучэньняў у Літве чатырох амэрыканскіх вайскоўцаў на палігоне ў Падбродзьдзі.
- 31 сакавіка Дзяржаўны мытны камітэт Беларусі паведаміў пра затрыманьне за нелегальнае перасячэньне беларускай мяжы 27-гадовага грамадзяніна ЗША. Паводле ведамства, амэрыканца затрымалі на чыгуначнай станцыі Маладэчна: ён ехаў зь Літвы «ў адным з парожніх вагонаў [таварнага] чыгуначнага цягніка».
- На наступны дзень Дзяржаўны мытны камітэт Беларусі расказаў падрабязнасьці. Паводле ведамства, мужчына 24 сакавіка двойчы спрабаваў уехаць на тэрыторыю Беларусі: раніцай праз пункт пропуску Каменны Лог (Меднікі зь літоўскага боку мяжы), а ўвечары таго ж дня — праз памежны пераход Беняконі (Салечнікі). Падчас памежнага кантролю ён ня змог пацьвердзіць наяўнасьць сродкаў для пакрыцьця выдаткаў на знаходжаньне ў Беларусі і выезд з краіны, таму яму адмовілі ва ўезьдзе, паведамілі ў Памежным камітэце.
- Паведамлялі, што пасьля прыцягненьня да адміністрацыйнай адказнасьці за незаконнае перасячэньне мяжы амэрыканца дэпартуюць на тэрыторыю Літвы, удакладнілі ў ведамстве.
- 1 красавіка ў літоўскай Службе аховы дзяржаўнай мяжы паведамілі, што 27-гадовы грамадзянін ЗША, якога затрымалі ў Беларусі, ніяк ня зьвязаны са здарэньнем на палігоне ў Падбродзьдзі, дзе падчас вучэньняў зьніклі чацьвёра амэрыканскіх вайскоўцаў. Паводле ведамства, гэты чалавек апошнія некалькі тыдняў знаходзіўся ў Літве на законных падставах. Супрацоўнікі літоўскай Службы аховы дзяржаўнай мяжы Літвы сустрэліся і размаўлялі зь ім 26 сакавіка на мяжы з Расеяй, на чыгуначнай станцыі Кібартай, а 27 і 30 сакавіка — ужо на мяжы зь Беларусьсю, у раёне чыгуначнай станцыі Кена.
